sábado, 11 de xuño de 2011

Maldicións

Maldito costume o de poñer nomes neutros e politicamente correctos aos centros de ensino. Revisando as listaxes dos traslados (si, non tiña mellor cousa que facer) descubrín que o antigo Piringalla de F.P. se chama agora Muralla Romana, como se fose un hotel ou un restaurante especializado en bodas.
Non debe ser alleo tampouco á redenominación o espirito prolatino que varre desde hai unha década esta cidade en que vivo, e que ten a súa eclosión petarda e kitch no Arde Lucus que, tempus fugit, novamente tomará as rúas de intramuros nunha semana a contar desde onte.
A cuestión está agora en se me exilio na Comarca como hai un ano ou se, facendo de tripas corazón, invito a Haddock a mergullarse na mai de todas as horteradas.

11 comentarios:

zeltia dixo...

Veña ho, animese a invitar ao seu amigo.
Dealle a oportunidade de xurar a dúo con vostede contra todas as horteradas posibles!

[conste que eu nunca estiven e non podo opinar]

mariajesusparadela dixo...

Eu tamén son de escapar, pero pode facelo mixto: un día presencial e o resto escapado...

Sigrid de Thule dixo...

Moitas veces, a mellor forma de escapar da horterada é mergullarse nela, precisamente para perderse. Bicos dominicais.

Xan dixo...

Non se pode fuxir eternamente. Unha boa terapia seria ver a horterada, descubrir a máis dun hortera coñecido enlodándose, e botar unhas boas risas

Bolboreteira dixo...

Vaia!!! Pois para min, se non hai cambio de plan , vai ser o me primeiro Arde Lucus, vou con moita curiosidade....Tamén e certo que unha se apunta ata a un bombardeo.
biquiños!

peke dixo...

Convide o amigo e a filla e vaia con eles e a srta. Kaplan a mergullarse na horterada. Seguro que as nenas o pasan de medo.

Concha López Fernández dixo...

Será que a quen lle toca poñer imaxinación e orixinalidade nos deseños, tamén se pillou na crise!
De todas formas, algo bo se sacará dese Arde Lucus, digo eu. Así que, aproveitar o que se poida! (Ou se queira!)

Chousa da Alcandra dixo...

Xa me dirás a ver que cara lle queda despois a unha profe cando lle pregunten onde traballa e teña que respostar "Eu no Muralla Romana". Claro que, para os que son de fora, escoitar dicir que traballaba "no Piringalla", tamén teno seu aquel.

E tamén animo a participar na queima de Lvcvs. Para unha vez que deixan xogar con lume...)
Apertas

Sun Iou Miou dixo...

Quede na horterada, que lle vai dar material para boas postaxes.

Félix Soria dixo...

Tes razón, o de "Muralla Romana" invita a facer reserva de habitación...

Anónimo dixo...

nunca fun ó Arde Lucus pero tal e como o contas parece que non perdín nada.

miña filla vai este ano cuns amigos, porque unha das rapazas que está no piso de estudantes con ela é de Lugo... está moi contenta coa idea, ademáis dín que se van disfrazar... pero xa se sabe, con 20 anos todo sabe a gloria bendita, o parecido.

biquiños,
Aldabra