mércores, 3 de xaneiro de 2007

Bonecas

Conta-me Ti que existe unha boneca extraordinária, e non só polo prezo (arredor dos 150 eurazos), senón porque, ademais de chorar, comer e defecar, pode falar coa sua mamá (ou ama) para pedir-lle o menu que lle apetece para xantar e as cousas que desexa facer, mesmo ir para a cama.
Ti sabe todo isto porque Papá Noel lla trouxo á afillada dunha amiga dela: o dia de Noitevella, a boneca escolleu para cear spaguetti e xelado; cando terminou, seguramente por mor da pesadez da dixestión, afirmou teimuda que era hora de dormir, e repentinamente esmoreceu, se é que a expresión é válida, deixou de estar operativa até que lle saíu dos circuítos e houvo que deixá-la na casa mentres todos marchavan a cear á casa da avoa (isto é, da bisavoa da boneca).
En calquer caso, o maior perigo desta boneca, a sua maior tirania, consiste en que se non son atendidas as suas necesidades básicas e caprichos, poderia morrer, desactivar-se para sempre, subir ao ceo infernal dos xoguetes, deixando atrás un corpo rosado e incorrupto e unha nena desconsolada.
De certo, á miña filla os Reis Magos non lle traerán nada semellante, ben o sei eu que fago funcións de paxe interino e bastante teño con diferenciar entre as Bratz, as Jaggets e as Barbies; recoñezo que son xoguetes sexistas, pero polo menos non se suicidan.

6 comentarios:

fisiologus dixo...

te estas justificando?

Tongzhi dixo...

O que eles inventam... Vivam as velhas bonecas de trapos e a imaginação das crianças!

Mrs.Doyle dixo...

Coñezo moitas nais e pais que loitan contra os xoguetes sexistas pero pouco poden facer contra a publicidade sexista que segue igual...

Ao final gana a vontade do pequeno e/ou a pequena... ¿Cómo negarlle algo que lle fai tanta ilusión por moi sexista que sexa?

Desexemos que eses pequenos, cando deixen de selo, recollan o testigo e sigan a loitar contra algo que non nos leva a bo porto...

Mrs.Doyle

Anonymous dixo...

En 2 palabras: im-presionante

Lúa dixo...

xesus!!!!é unha boneca infernal!!!!!que medo me dan esas cousas!!!!coma Chucky, imaxinas?????uffffff

Arin dixo...

Eu oín falar desa caste de bonecas suicidas e carísimas; cando llo propuxemos ás nosas fillas dixeron que lles daba medo, e non me estraña!